Fondaĵo pri Esperantaj Studoj

El Vikipedio, la libera enciklopedio
(Alidirektita el Esperantic Studies Foundation)
Saltu al: navigado, serĉo

La Fondaĵo pri Esperantaj Studoj (angle: Esperantic Studies Foundation, ESF) estas interlingvistika instanco starigita en 1968 en la usona ĉefurbo Vaŝintono. Ĝi aŭspicias kaj apogas konferencojn kaj studojn pri la lingva diverseco tutmonda kaj eblaj rimedoj por la egaleca kaj daŭra kunekzistado de lingvoj. La plimulto de la projektoj ĝis nun apogitaj rilatas tute aŭ parte al Esperanto, kiun la fondaĵo konsideras “modesta sed reala sukceso kiel lingvo de internacia kaj interkultura komuniko”. La plejparto de la financaj rimedoj de la organizo baziĝas ĉe la mondonaco de usona esperantistino Cathy Schulze.

Ĝi turnas sin precipe al edukaj projektoj kaj sciencaj esploroj. Inter la projektoj subtenataj de ESF estas kelkaj esperantologiaj esploroj kaj la retejoj: Edukado.net, lernu!, (historie) Lingva Prismo kaj Tekstaro. Ĝi, interalie, subtenas la serion de Nitobe-Simpozioj celitajn por altigi la nivelon kaj intensecon de publika kaj politika debato pri lingvopolitiko, la serion de lingvorilataj prelegoj ĉe la Unuiĝintaj Nacioj en Novjorko, Nord-Amerikan Someran Kursaron, la interlingvistikajn kaj esperantologiajn studojn ĉe la Universitato Adam Mickiewicz en Poznano (Pollando), kaj ĝi provizas subtenon al universitataj esploristoj por fari esplorojn kaj publikaĵojn, rilatajn al la celoj de ESF.

Eksteraj ligiloj[redakti | redakti fonton]