Nombra akso

Nombra akso (aŭ nombrakso, nombra linio) estas rekto, sur kiu oni difinis direkton (nomatan la pozitiva direkto), punkton origino $O$, respondan al 0 (nulo) kaj la skalon (kutime indikatan per alia punkto responda al la pozicio de 1).

Sekve de tio al ĉiu reelo $r$ respondas ekzakte unu punkto $P$ de la akso, tia ke la vektoro $OP$ estas direktita laŭ la pozitiva direkto, se $r>0$, en la kontraŭa direkto, se $r<0$, aŭ estas la punkto $O$, se $r=0$; kaj la longo de la vektoro estas la absoluta valoro $|r|$.

Nombra akso kun aparte indikitaj nombroj e, π kaj ${\sqrt {2}}$ (kvadrata radiko de 2)

La nombran akson oni ofte uzas por bildigi la aron de ĉiuj reeloj $\mathbb {R}$ kaj por desegni grafikaĵojn de funkcioj. Oni ankaŭ bildigas intervalojn per rektosegmentoj de la nombrakso.