Quorn

Quorn [Kvorn] estas la markonomo por produkto kun kiel bazo fermentita micelio de la ŝimaĵo Fusarium venenatum kaj estas uzata de vegetaranoj kiel anstataŭaĵo por viando.

Ĝi konsistas por 45% el proteino kaj 13% el graso. Plue oni aldonis vitaminojn kaj mineralojn. Kiel aglutinilo oni uzas ovoblanko de kokinaj ovoj, tial ĝi ne taŭgas por veganoj.

La ŝimaĵo estis en 1967 izolita el la grundo de agrokulturejo en Britio, sed dum longa tempo oni ne faris ion per ĝi ĝis esploristoj malkovris ĝian valoron. En 1985 ĝi por la unua fojo estis surmerkatigita de "Marlow Foods", post testperiodo de dek jaroj. Nur post kiam en 1994 la superbazarĉeno "Sainsburys" komencis vendi ĝin ĝi fariĝis grava produkto en Britio. Post tio oni enkondukis ĝin en tuta Eŭropo kaj en 2002 ankaŭ en Usono. En 2006 ĝi vendiĝis en Britio, Nederlando, Belgio, Svedio, Svislando kaj Usono.

Ekstera ligilo

• Quorn.com, retejo (diversaj lingvoj)