Dieter Rooke

Dieter Rooke kiel gasto en familio Bélisle en La Chaux-de-Fonds. Fotis en 2013 Mireille Grosjean

Dieter ROOKE (di:ter ro:ke laŭ prononco en la normgermana ) (naskiĝis en 1948) estas germana esperantisto loĝanta en Svislando. Esperantistiĝis en 1982, en 1999 aliĝis al Internacia Komunista Esperantista Kolektivo (nuntempe estas ĝia sekretario) kaj al SAT, ĉar en ĝi ekzistas komunisma frakcio. Dumviva membro kaj de UEA, kaj de SES. Aktivas en la Esperanta Civito kiel senatano de la ruĝa frakcio. Kontribuas al la enhavo de Internaciisto per primarksisma kurso kaj per porokazaj raportoj pri politikaj eventoj. De 1993 ĝis 2002 Dieter Rooke estis estrarano de Esperanto-Societo Zuriko. Membro de LF-koop. Membro de Monda Asembleo Socia (MAS). Membro de KCE en la Chaux-de-Fonds. Estrarano de Tutmonda Esperantista Ĵurnalista Asocio kiel sola amatoro. Kasisto de Ateista Tutmonda Esperanto-Organizo (ATEO). Membro de tutsvisa ĥoro, estrata de E. Mestral.

Partoprenis multajn UK-ojn, la lastan en Rejkjaviko (Islando), kaj aliajn E-aranĝojn. Korespondas kun radiostacioj de Havano, Pekino, kaj Varsovio. Aktivas interrete - kontribuas al Vikipedio.

Patro de denaskulo, Ciril Läng.

Dieter Rooke vivis en kooperativo en Oensingen, Svislando. Inter septembro 2012 kaj sia emeritiĝo jaron poste li vivis kun sia ĉina edzino en la Esperanto-Domo KCE en La Chaux-de-Fonds, Svislando.