Uwe-Joachim Moritz

Uwe-Joachim MORITZ estis germana esperantisto, eksinstruisto kaj lingvo-aktivisto. De 1961 ĝis 1964 kaj de 1965 ĝis 1969 li estis prezidanto de Germana Esperanto-Junularo, ekde la jaro 1972 la unua redaktoro de la revuo Etnismo, kaj de ties fondiĝo en 1978 ĝis la jaro 1998 prezidanto de la fakasocio Internacia Komitato por Etnaj Liberecoj.

Jam dum la tempo, kiam li estis prezidanto de GEJ, li pro tiu ofico estis ankaŭ estrarano de Germana Esperanto-Asocio (GEA), kaj poste li multajn jarojn plu membris en la GEA-estraro.

Vivo[redakti | redakti fonton]

En la 12-a gimnazia klaso, Uwe-Joachim Moritz fine de 1957 kaj komence de 1958 kun Richard Reuchlin estis organizanto de la unua Internacia Seminario de GEJ. Post abiturienta ekzameno en 1959 en la gimnazio Herbart de Oldenburg en norda Germanio, li dum jaro plenumis la devan armeservon. Sekve li inter 1960 ĝis 1965 studis pedagogion en la universitato de Münster (Vestfalio), kaj tuj studokomence la 3-an de novembro 1960 kune kun Willi Brandenburg, Joachim Schrapp kaj kelkaj aliaj fondis la "Studentan Esperanto-Klubon en la universitato de Münster".

Inter la jaroj 1966 kaj 1968 li instruiste staĝis en gimnazioj de Ahaus kaj Münster, unu jaron laboris kiel instruisto en la gimnazio de Düren kaj inter la jaroj 1969 kaj 2004 estis instruisto pri la fakoj historio, la hispana, la franca kaj pri Esperanto en la urba gimnazio de Eschweiler en la germana federacia lando Nordrejn-Vestfalio.

Post emeritiĝo, li en 2005 retranslokiĝis al norda Germanio kaj tie vivis en Hatten-Sandhatten proksime de Oldenburg ĝis lia morto. Krom pri Esperanto, li engaĝiĝas pri pli da kultura subteno por multaj malpligrandaj eŭropaj lingvoj, inter ili aparte pri la kataluna, la eŭska kaj la platgermana. Publikaĵojn li amplekse verkis ne nur en Esperanto, sed ankaŭ en la platgermana kaj la norma germana.

Li mortis meze de marto 2024.

Eksteraj ligiloj[redakti | redakti fonton]