16-a Hispana Kongreso de Esperanto

El Vikipedio, la libera enciklopedio
Salti al navigilo Salti al serĉilo
Ĉi tiu artikolo estas verkita en Esperanto-Vikipedio kiel la unua el ĉiuj lingvoj en la tuta Vikipedia projekto.

La 16-a Hispana Kongreso de Esperanto okazis dum la 23a ĝis la 27a de julio 1955 en Ĥiĥono, Asturio, Hispanio. Partoprenis en ĝi preskaŭ 300 kongresanoj, plej parto el Hispanio.[1] Tiu estas la unua fojo ke la Hispana Kongreso de Esperanto okazis en Ĥiĥono, la dua estos en 1979.

La programo konsistis el tre diversaj programeroj. Krom la kutimaj organizaj sesioj kaj laborkunsidoj, okazis kunsido de la estraro de la Hispana Esperanto Federacio kaj malfermo de ekspozicio (sabate, la 23a), diservo kun esperanta prediko fare de Pastor Casanovas, el Ĝirono, malfermo kaj akcepto en la Urbodomo, vizito al la Labora Universitato kaj oficiala fotado (dimanĉe, la 24a) literatura festo (lunde la 25a), veturo al Oviedo kaj akcepto en la Urbodomo, vizito al la Katedralo de Oviedo kaj aliaj monumentoj (marde la 26a) kaj ekskurso al Covadonga (Itinero: Infiesto, Arriondas, Cangas de Onís, Covadonga, Ribadesella, Villaviciosa.[2]

La Organiza Komitato estis prezidita de Alfredo Villa González, kaj en ĝi partoprenis ankaŭ José Fernández Álvarez, Alfredo Villa Villa, Alberto Menéndez González, Nicanor García García, José Ordieres Dacosta, José Palacios Tuero, Dimas González Argüello, Francisco Ignacio Taibo, Enrique Riestro de la Roza, Manuel Blanco Chico, Luis García González, Eloy Noriega Álvarez, Adonis González Meana, Alcibíades González Meana kaj José Manzano Bartolomé.[2] En tiu epoko la prezidanto de la Hispana Esperanto Federacio estis Rafael Herrero Arroyo el Valencio.[2]

Kiel kutime en la epoko de frankismo estis bonaj rilatoj kun la aŭtoritatoj de la Diktaturo de Franco kaj tiele estis Honora Komitato prezidita de la Guberniestro de la Provinco kaj konsistita el 15 plusaj aŭtoritatoj de ĉiu nivelo (arkiepiskopo, militistoj, juĝistoj ktp.), plus Kunlabora Komitato de 19 plusaj duarangaj gravuloj, inter kiuj multaj ĵurnalistoj.[2] Tiukuntekste en la Kongreslibro estas ĉapitro pri "Esperanto en Hispanio" kun informo pri la kongresoj de 1909 (UK), 1920, 1921, 1923, 1924, 1925, 1926, 1928, kaj 1929, sed la kongresoj de 1932, 1933 aperas listigitaj sed kun neniu priskribo. Surprize poste venas noto pri aludo al persekutado tuj post la milito[3] kaj rekupero de "normaleco" el 1947. Poste estas priskribitaj tiuj de 1951, 1952, 1953 kaj 1954.[2]

En la Kongreslibro estas kopiitaj tri poemoj de Ludoviko Zamenhof, nome "La espero" (komenca paĝo), "Prego [tiel] sub la verda standardo" kaj "La vojo" (kun traduko hispanen de Alfredo Villa y Villa kiel "La senda" kaj partituro).

Notoj[redakti | redakti fonton]

  1. 285 laŭ la kongreslibro, Ĥiĥono, 1955, 32 paĝoj.
  2. 2,0 2,1 2,2 2,3 2,4 Laŭ la kongreslibro, Ĥiĥono, 1955, 32 paĝoj sen paĝonumerigo.
  3. Malofta aludo tuj post la milito, sed ia antaŭanonco de mildigo de la diktaturo.