Bhalchandra Nemade

El Vikipedio, la libera enciklopedio
Jump to navigation Jump to search
Bhalchandra Nemade

Bhalchandra Vanaji Nemade ([bhaalĉandra vanaaĝi nemade], nagarie: भालचंद्र वनाजी नेमाडे) (n. 1938) estas maratha romanisto, poeto, kritikisto, kaj edukisto el Maharaŝtro, Barato. Li gajnis la beletran premion Gjanpith de la barata registaro en 2014.

Li studis la lingvistikon kaj la anglan literaturon. Li instruis la anglan, la marathan, la komparan literaturon, kaj la antropologion en diversaj universitatoj en Barato kaj eksterlande. Li emeritiĝis de Universitato de Mumbajo.

Lia plej konata romano estas Kosala (La pupo) (1963). Ĝi estas fikcia aŭtobiografio: "[La ĉefrolulo] preskaŭ similas al mi, kaj multaj vilaĝaj knaboj spertas tian ĉi duon-frustriĝon, duon-degeneron, kaj aparte la moderniĝon, kiun mi ĉiam egaligas al la perdo de la kulturo", li diris en intervjuo (anglalingva) en 2010.[1] La romano estis tradukita en plurajn aliajn lingvojn. En 2010 aperis Hindu (2010), la unua parto de romankvaropo kies imago rangas ĝis la Induso-civilizacio.

Kiel literatura teoriisto, Nemade forte subtenas la kultivadon de la propraj lingvo kaj kulturo, kaj kontraŭas la tutmondiĝon: "Ni devas esti diversaj kaj pluralaj ĉar nia kulturo estas diversa kaj plurala. Jen la etoso kiun mi klopodas evoluigi".[1] Li ankaŭ estas forta subtenanto de la gepatralingva edukado.

Notoj[redakti | redakti fonton]

  1. 1,0 1,1 Meena Menon, "Reviving the true Hindu ethos", The Hindu, 3 July 2010, http://www.thehindu.com/features/friday-review/religion/article498585.ece