Jiří Harcuba
| Jiří Harcuba | |
|---|---|
| Persona informo | |
| Naskiĝo | 6-an de decembro 1928 en Harrachov |
| Morto | 26-an de julio 2013 (84-jaraĝa) en Prago |
| Tombo | Břevnov-tombejo |
| Lingvoj | Esperanto • ĉeĥa |
| Ŝtataneco | Ĉeĥio • Ĉeĥoslovakio |
| Okupo | |
| Okupo | esperantisto • skulptisto • medalisto • instruisto • glass artist |
Jiří HARCUBA (naskiĝis la 6-an de decembro 1928 en Harrachov, mortis la 26-an de julio 2013) estis ĉeĥa vitristo, skulptisto kaj esperantisto.
Unue li lernis tajli vitron (1942-1945) en Harrachov, poste li studis en Ŝtata Faka Vitrista Lernejo en Nový Bor (1945-1948), ĉe la pedagogia fakultato de universitato en Olomouc (1948), tri jarojn li praktikis vitrotajladon en la entrepreno „Artisma Vitro“ en Nový Bor kaj finis siajn studojn ĉe Art-industria Altlernejo en Prago (1949-1957).
Li kreis monerojn kaj medalojn aŭ vitrajn reliefojn (vitrogravuraĵoj) kun portretoj de famaj artistoj, sciencistoj, politikistoj (i.a. Komenio, Albert Einstein, Franz Kafka, Antonín Dvořák). Ampleksa estas ankaŭ lia medalista verkaro, dum kiu li uzis teknikon de vitrografio. Li faris projektojn de centoj da medaloj kaj moneroj. En Ĉeĥio ĉiu loĝanto konas lian 5-kronan moneron. Ekde 1976 li estis membro de Ĉeĥa Esperanto-Asocio. Por esperantistoj li proponis renovigon de Esperanto-monumento en Františkovy Lázně, sed pro manko de financoj la projekto ne efektiviĝis (AEH tie metis memortabulon pri la malnova monumento detruita de la nazioj). Lia verkaro estas koncize prezentita en Esperanto-Muzeo en Svitavy kadre de la ekspozicio Esperanto kaj muzoj, okazanta ekde junio 2013 ĝis majo 2014.
Jiří Harcuba estas alte aprezata en sia fako en la tuta mondo, ofte li estis invitata prelegi ĉe altlernejoj kaj universitatoj aŭ krei portretojn de famuloj.