Uzanto:Tempodivalse/Ŝablonoj

Kelkaj opinioj pri Vikipedio kaj Esperanto

Mi havas kelkajn opiniojn pri Esperanto kaj la Esperanta Vikipedio kiujn mi volus esprimi ĉi-malsupre, se iu trovos ilin iel interesaj.

Mi kredas ke, el ĉiuj ekzistantaj Vikipedioj, la Esperanta havas la plej multan potencialon. Nacilingvaj vikioj plejparte havas kontribuantojn de nur unu kulturo; do kutime nur kelkaj vidpunktoj estas plene reprezentataj. Tamen nia uzantaro estas unu el la plej diversa. Tio ja estas avantaĝo potenca; oni ne forgesu pri ĝi.

Samtempe al mi ne tre plaĉas la neologismoj aperintaj en la lingvo; legante ilin, mi foje ĉagrenetiĝas. Kial elpensi tute novajn vortojn pri modernaj temoj kaj ideoj, kiam oni simple povus krei kompreneblan vorton el jamaj radikoj?

Iuj diras, ke la vortoj (interalie) trajno, adolto, liva, ktp. pliriĉigas Esperanton, ĉar ties bazvortaro estas malgranda komparite kun nacilingvoj. Sed ĉi-tio, laŭ mia opinio, estas nur plibalastigo: La unua kaj ĉefa celo de Esperanto estis plifaciligi interkulturan kaj interlingvan komprenon. Esperantistoj en Azio ne ĉiam bone scipovas la okcidentajn lingvojn, el kiuj devenas neologismoj. Tio devigas ilin lerni nenecesajn radikojn. Ĉi tial mi klopodas laŭeble skribi simple (sed samtempe bonstile).

Esperanto estas sendependa, vivanta lingvo; oni ne komparu ĝin kun nacilingvoj, kaj ne troe zorgu pri la grandeco de nia vikio kompare al iliaj. La plej grava afero estas kvaliteco, ne grandeco. La nuna enhavo de EO-Vikio jam estas mirinda elfaro: neniu alia lingvo, havanta malpli ol du milionojn da fluparolantoj, entenas tiom da artikoloj en sia propra vikiprojekto.