Šuto Orizari

El Vikipedio, la libera enciklopedio
Salti al navigilo Salti al serĉilo
blazono

Шуто Оризари, makedone jen en la kutima cirila alfabeto, latine Šuto Orizari, cigane Shuto Orizari, aŭ simple Шутка respektive Šutka estas unu el la dek municipoj kiuj kune konsistigas la urbon Skopjo, la ĉefurbo de la respubliko Makedonio. La municipo estas la laŭ la stato de novembro 2014 inter la tre malmultaj lokoj de la mondo kie la cigana lingvo estas oficiala komunikilo (aliaj kazoj estas kunoficiala statuso en 79 komunumoj de Rumanio inkluzive de Budeşti, statuso de regiona lingvo de Kosovo, kaj statuso de minoritata lingvo en Svedio kaj Finnlando). Kialo por la oficialeco en Šuto Orizari estas, ke temas pri la sola municipo en la respubliko en kiu la romaoj konsistigas la plimulton de la loĝantaro: Laŭ la censo de 2002, el tuta loĝantaro de 22 017 homoj, 17 415 homoj, do 79,1 procentaĵoj, estis romaoj.[1] Aliaj signifaj etnaj grupoj estis albanoj (2 012 homoj aŭ 11,9 procentaĵoj, kaj makedonianoj (1 200 homoj aŭ 7,1 procentaĵoj. Dum la konfliktoj de la la Kosova milito multaj romaaj rifuĝintoj trovis novan vivlokon ĉi-tie. La precipaj religioj inter la municipanoj estas ortodoksa kristanismo kaj islamo.

Politiko[redakti | redakti fonton]

Koresponde al la demografio, kaj la cigana kaj la makedona lingvo estas oficialaj lingvoj en Šuto Orizari. La albana ankaŭ estas multe uzata en la publika vivo, sed ne estas oficiala lingvo. La urbestro de la municipo laŭ la stato fine de la jaro 2014, Elvis Bajram, estas romao.

En 2009, la registaro de la Respubliko de Makedonio intensigis siajn klopodojn pli forte integrigi la lokajn romaajn infanojn en la edukajn programojn de la lando. Ŝtate pagita mezlernejo en Šuto Orizari, en kiu la cigana kaj la makedona estas la instruaj lingvoj, ekkonstruiĝis la 10-an de februaro 2009 kaj fine signifis investon de 1,6 milionoj da Eŭroj.[2]

Referencoj[redakti | redakti fonton]

Eksteraj ligiloj[redakti | redakti fonton]