Vilma Sindona Eichholz
| Vilma Sindona Eichholz | |
|---|---|
| Persona informo | |
| Naskiĝo | 30-an de novembro 1925 |
| Morto | 15-an de julio 1995 (69-jaraĝa) |
| Mortokialo | kancero |
| Lingvoj | Esperanto |
| Ŝtataneco | Kanado • Germanio |
| Familio | |
| Edz(in)o | Rüdiger Eichholz |
| Okupo | |
| Okupo | antropologo • lingvisto • esperantisto |
Vilma Sindona EICHHOLZ (naskiĝis kiel germanino en 1926 en tiam germana parto de Silezio; mortis la 15-an de julio 1995 en Bailieboro, Ontario pro kancero) estis instruistino, kanada esperantistino kaj vicprezidantino de Kanada Esperanto-Asocio.
Vivo[redakti | redakti fonton]
Post fuĝo el Silezio dum la fino de la dua mondmilito ŝi ekkonis Rüdiger Eichholz en okcidenta Germanio kaj edziniĝis al li. Komence de la 1950-aj jaroj la paro elmigris al Kanado, kie naskiĝis tri infanoj, kiujn la geedzoj edukis kiel denaskulojn.
Vilma Eichholz vojaĝis al Srilanko dum la jaro 1979 kaj pri siaj tieaj spertoj eldonis 12-paĝan libreton: Impresoj de esperantistino en Srilanko. (Ontario, 1979). Ŝi estis verŝajne la unua eksterlanda esperantisto vizitanta la azian insullandon. El ŝia agado tie rezultis la naskiĝo de la kerno de la srilanka esperanta movado kaj la fondo de Esperanto-Centro Srilanka en Nugegoda, fare de Daniel Balasingham Jesudason, lernanto de s-ino Eichholz.
En la 1990-aj, post la fino de la soveta bloko, ŝi instruis Esperanton i.a. en Kaliningrado (iama Kenigsbergo en Orienta Prusio).
Verkoj[redakti | redakti fonton]
Ŝi verkis kompleksan rektmetodan kurson por infanoj, En novan mondon (1984), kaj anglalingvan broŝuron pri justa dulingveco en Kanado (1982), kompilis kun sia edzo Rüdiger Eichholz la ampleksan artikolaron Esperanto in the Modern World (Esperanto en la moderna mondo) (1982), kaj kreis instruajn kartludojn. Ŝi multe subtenis la terminarajn laborojn de la edzo kaj ekzemple reviziis la malneton de la Esperanta Bildvortaro (aperinta en 1988). Ŝi ankaŭ mem verkis pri "neologismoj" kaj pri "seksa diskriminacio" en Esperanto. Krome ŝi subtenis sian edzon pri la eldonaĵoj de Esperanto Press.
Ŝi estis dumviva membro de Universala Esperanto-Asocio kaj delegito pri ĝardenkulturo.
Vidu ankaŭ[redakti | redakti fonton]
- Esperanto-eldonejo "Esperanto Press"
Literaturo[redakti | redakti fonton]
- 1995: [Nekrologo]. En: Terminoteko 5a jaro 1995, n-ro 2 (12) Arkivigite je 2013-12-24 per la retarkivo Wayback Machine, p. 64.
Eksteraj ligiloj[redakti | redakti fonton]
- Libroj kaj aliaj dokumentoj[rompita ligilo] de kaj pri Vilma Sindona Eichholz en la Kolekto por Planlingvoj kaj Esperantomuzeo Arkivigite je 2007-12-21 per la retarkivo Wayback Machine
- Artikoloj Arkivigite je 2008-05-09 per la retarkivo Wayback Machine de kaj pri Vilma Eichholz en Elektronika Bibliografio de Esperantaj Artikoloj (EBEA)