Baziliko de Superga

El Vikipedio, la libera enciklopedio
Salti al navigilo Salti al serĉilo
Baziliko de Superga, fronte
Kupolo de la Baziliko de Superga

La Baziliko de Superga situas sur monteto je deko da kilometroj for de la centro de Torino. Oni konstruis ĝin sur artefarita teraso je 670 metroj alta, kiu ebligas panoraman vidon al la urbo kaj al la Alpoj. Dentorela montfervojo ebligas atingi ĝin.

Dum la sieĝo de Torino far de la trupoj de la franca reĝo Ludoviko la 14-a, la duko Viktoro-Amadeo la 2-a de Savojo kaj la princo Eŭgenio de Savojo-Karinjano supreniris sur la monteton de Superga por observi la batalon je la 2-a de septembro 1706. Ili votis konstrui kultejon dediĉitan al la Sankta Virgulino Maria, okaze de venko de la piemonta armeo.

La konstruadon oni komencis je la 10-a de julio 1717 sub la gvido de la arkitekto Filippo Juvarra kaj la reĝo de Sardio Karlo-Emanuelo la 3-a de Savojo inaŭguris la bazilikon je la 5-a de novembro 1731, kvankam ĝi ne estis finkonstruita.

Viktoro-Amadeo la 3-a de Savojo ordonis al la arkitekto Francesco Martinez, kiu estis la nepo de Filippo Juvarra, ke li konstruu la kripton de la baziliko. Ĝin oni finkonstruis en 1778. La suverenoj de la Domo de Savojo estas tie entombigitaj, de Viktoro-Amadeo la 2-a ĝis Karlo-Alberto escepte Karlo-Felikso, kiu estas entombigita en la abatejo de Hautecombe. Iliajn funebrajn maŭzoleojn verkis la plej famaj arkitektoj kaj skulptistoj, kiel la fratoj Collino, Agostino Cornacchini, Giovanni Battista Bernero, Pietro della Vedova, Sante Varni, Salvatore Revelli kaj Angelo Cuglierero.

Eksteraj ligiloj[redakti | redakti fonton]