Provinco Helmand
| Helmand هلمند
| |
|---|---|
| |
| provinco de Afganio | |
| Bazaj informoj | |
| Ĉefurbo | Laŝkar Gah |
| Areo | 58 584 km² |
| Loĝantaro | 860 000 (stato de 2007/2008) |
| ISO-kodo | AF-HEL |
Helmand (perse هلمند), ankaŭ Hilmand aŭ Helmund, estas unu el 34 provincoj de Afganio. Ĝi situas en la sudo kaj laŭ la stato de 2010 konsideratas nesekura. Provinca ĉefurbo estas Laŝkar Gah. La nuntempa provincestro estas Mohamad Gulab Mangal.[1] La provinco havas 860 000 loĝantojn.[2]
Historio
Helmand historie estis parto de la irana provinco Sistan, ĝis la jaro 1940 estis parto de la afgania provinco Kandahar kaj ekde 1958 estas memstara provinco (komence sub la nomo Giriŝk laŭ la samnoma urbo). Fine de aprilo 1964 la nomo ŝanĝiĝis al Helmand - laŭ la rivero Hilmend Rud, la plej longa rivero de Afganio.
Helmand post la forpelo de la Talibanoj el registara potenco en 2001 estas unu el la centroj de rezisto kontraŭ la ne-talibana registaro de Hamid Karzai kaj la surlokaj NATO-soldatoj. Samtempe la kultivo de papavo por produkto de opio per profitiga por lokaj "drogobaronoj" tre multiĝis.
Ekde marto 2007 NATO- kaj afganaj soldatoj komencis la "operacion Aĥilo", por forpeli la talibanojn el la regiono. La 2-an de julio 2009 pli ol 4000 usonaj kaj 650 afganiaj soldatoj komencis la "operacion Ĥanĝar", la ĝis tiam plej granda armea atako ekde la enmarŝo de usonaj soldatoj en Afganion en 2002. Laŭ gazetaraj raportoj temis pri la plej granda ofensiva ago de la usona armeo post la milito en Vjetnamio.[3]
Ekde februaro 2010 NATO- kaj afganaj soldatoj komencis la "operacion Mustarak", ankoraŭ pli granda atako ol tiu de 2009, ĝis tiama kulmino de la milito en Afganio.
Distriktoj
- Bagran
- Diŝu
- Garmsir
- Geriŝk
- Ĥanaŝin
- Kaĝaki
- Navzad
- Musa Kala
- Laŝkar Gah
- Nava-I-Barakzaji
- Nad Ali
- Vaŝir
- Sangin
Ekonomio
Helmand precipe konsistas el dezertoj (ekzemple Daŝti Margo) kaj fekundaj riveraj valoj. La ekonomio baziĝas je proksimume 75 % agrikulturo (aparte akvomelonoj), 20 % bestobredado kaj 5 % servoj. La lastajn 15 jarojn plimultiĝis la kontraŭleĝa kultivo de opio por produkto de opio.[4]
Kvinjara tute seka periodo inter la jaroj 1999 kaj 2004 sekigis multajn putojn. Al proksimume 45 procentaĵoj de la loĝantoj urĝe mankas trinkakvo. Krome mankas elektro, lernejoj kaj malsanulejoj. Post la sekurigo de tiuj bazaj bezonoj gravas la riparo de la akvobaraĵo Kaĝakai kaj de sistemoj por agrikultura akvigo.[5]
Helmand havas flughavenon sude de Laŝkar Gah.[6]
Eksteraj ligiloj
- detalaj informoj pri la provinco de la nacia ministerio de malurba evoluo (formato PDF, stato 2007)
- provinca mapo fare de la institucio AIMS (Afghanistan Information Management Services)
- "Hölle Helmand" ("infero Helmand" germanlingva artikolo pri la kultivo de opio en Helmand en la retejo spiegel.de
Notoj
- ↑ provincestroj en Afganio (angle), stato aŭgusto 2010
- ↑ nacia enketo pri riskoj kaj vundeblo 2007/8 (angle) en la retejo de la centra statistika organizaĵo de Afganio, PDF-dokumento de 1,77 MB, stato oktobro 2009, paĝo 4
- ↑ retejo de la germania televida novaĵelsendo Tagesschau, la 2-an de julio 2009
- ↑ detalaj informoj pri la provinco de la nacia ministerio de malurba evoluo (angle, stato oktobro 2006)
- ↑ "Kiuj estas la plej urĝaj evoluaj projektoj en Helmand?", teksto anglalingva de la nacia ministerio de malurba evoluo
- ↑ informo de la afgania ministerio pri transporto kaj civila aviado
Badaĥŝan | Badgis | Baglan | Balĥ | Bamijan | Daikondi | Farah | Farjab | Gazni | Gor | Ĝuzĝan | Helmand | Herat | Ĥost | Kabul | Kandahar | Kapisa | Kunar | Kunduz | Lagman | Lugar | Nangarhar | Nimruz | Nuristan | Paktia | Paktika | Panĝŝir | Parvan | Samangan | Sar-i Pul | Taĥar | Uruzgan | Vardak | Zabul