Hipopotamo de Allenton
 |
 |
 |
 |
La Hipopotamo de Allenton estas konsiderinda skeleto de Hipopotamo (Hippopotamus amphibius) trovita en Allenton (Derby), Anglio en 1895.[1] La skeleto estas ekspoziciata en Muzeo kaj artgalerio de Derby kaj estas 3 metrojn (9.8 futojn) longa. Ĝi estas solenita hodiaŭ per skulptaĵo apud la loko kie la skeleto estis trovita.[2]
Historio[redakti | redakti fonton]
La suburbo de Derby nomita Allenton estis vilaĝo 5 km-ojn for de Derby. Fosado de nova puto ĉe Crown Inn en la vilaĝo estis entreprenita en marto 1895, sed la laboro haltis kiam la fosantoj malkovris unue malbonodoron kaj poste longajn kaj nekutimajn ostojn. Kelkaj altranguloj konsentis financi pliajn sondojn kaj estis konsentite ke la trovaĵoj estu partigitaj kun la komunumo. La truo estis pligrandigita ĝis areo de 4.5 m² (48 kv. futoj) kvankam la profundo estis kaŝita de akvo, kiu leviĝis ĝis 1.8 m (6 futoj) de la surfaco. Pumpiloj estis havigitaj kaj homoj estis dungitaj por funkciigi ilin por ebligi ke la truo estu plue fosata. Tiuj procedoj estis observitaj de H.H. Bemrose kaj R.M. Deeley kiuj poste skribis raporton pri la fosado.[3] Kiel konsentite kun la homoj kiuj financis ĝin la ostoj estis transdonitaj al Muzeo de Derby kiu tiam estis malfermita jam de dek ses jaroj.[4] Ili fine malkovris 127 ostojn kiuj venis plejparte el la hipopotamo, kun kelkaj apartenantaj al rinocero kaj elefanto. Arnold Bemrose prenis tiujn ostojn kiel subtenan pruvon ke Britio havis surteran ponton al Eŭropo, tial ke ĝi estis la plej evidenta klarigo al la trovo de tiuj ostoj en Anglio, Eŭropo kaj sub la Norda Maro.[1]
La hipopotamo de Allenton kaj aliaj animalaj restaĵoj de Boulton Moor ĉiuj devenis de elstaraĵo konata kiel "Allenton Terrace" - deponaĵo de riveraj gruzoj ĉirkaŭ 6 m-ojn (20 futojn) super la nivelo de la nuna Rivero Derwent. La deponaĵoj estis datitaj de la interglacia epoko de Ipswich, de antaŭ ĉirkaŭ 120,000 jaroj. La ĉeesto de hipopotamo indikas ke la klimato estis pli varma ol hodiaŭ. La vintroj ne havis longajn periodojn de frosto kaj la averaĝa somera temperaturo superis dek ok gradojn celsiajn]].[5]
Postaj malkovroj[redakti | redakti fonton]
En julio 1973 laboristoj malkovris aliajn fragmentojn de ostoj dum fosado apud Boulton Moor - kelkaj el ili estas ankaŭ ekspoziciataj en Muzeo kaj artgalerio de Derby. Tiuj fosaĵoj, por kloako, malkaŝis ostojn de urso, cervo, bovo kaj pliajn ostojn de hipopotamo, rinocero kaj elefantoj. Tiuj trovaĵoj estis nur unu aŭ du ostoj - la plej bona malkovro estis unu el la plej longaj dentoj de hipopotamo trovitaj en Britio.[6]
En 2006 Michael Dan Archer estis komisiita por krei skulptaĵon por Allenton, Derby. Diskutoj en Allenton rivelis deziron en la komunumo havi ion kiu respegulu la historion de la areo. Skulptaĵo de Archer konsistas el tri sekcioj de rompita ringo el nigra granito de sufiĉa grandeco por formi sidlokon. Super la polurita granita surfaco estas lokitaj kopioj el giso de ostoj el la skeleto de la hipopotamo. Krom la malsupra makzelo, kiu estis fandita el argila muldaĵo, sortimento de aliaj ostoj estis elprenitaj el Muzeo de Derby al Universitato de Loughborough kie ili estis laser-skanitaj por krei 3D komputilan modelon. Tiu modelo tiam ebligis fari ekzaktajn kopiojn de la ostoj elektitaj de Archer por esti fanditaj en feron.[2]
Referencoj[redakti | redakti fonton]
- ↑ 1,0 1,1 Arnold Bemrose, H.H.. (1910) Derbyshire. Cambridge University Press, p. 172. “In 1896, the author and Mr R.M. Deeley obtained the greater portion of the skeleton of a hippopotamus, together with part of the breast-bone of an elephant and of the femur of a rhinoceros, in the Derwent gravel at Allenton, immediately to the south of Derby. These bones are now in the Museum at Derby.”.
- ↑ 2,0 2,1 . Derby Sculpture. archersculpture.co.uk. Arkivita el la originalo je 2011-05-05. Alirita 2011-05-27. Arkivita kopio. Arkivita el la originalo je 2011-05-05. Alirita 2011-05-27.
- ↑ (August 1896) “Discovery of Mammalian Remains in the Old River-gravels of the Derwent near Derby”, J. of the Geological Society.
- ↑ Derby Museum Treasures. Arkivita el la originalo je 2011-05-07. Alirita 2011-05-28.
- ↑ van Kolfschoten, Th. (2000). “The Eemian mammal fauna of central Europe”, Netherlands Journal of Geosciences 79 (2/3), p. 269–281. “...the hippopotamus, Hippopotamus amphibius, and the water buffalo, Bubalus murrensis, present in the Eemian fauna, indicate a climate with relatively high summer temperatures (mean July temperature > 18 °C) and the absence of periods of severe or long-lasting winter frost”.
- ↑ Grange, William. (2003) When Hippos ... Swam in the Derwent. Derby Museum and Art Gallery.
Eksteraj ligiloj[redakti | redakti fonton]
- Oficiala retejo de Muzeo kaj artgalerio de Derby Arkivigite je 2011-09-26 per la retarkivo UK Government Web Archive