Atako de Hamaso kontraŭ Israelo

Ĉi tiu artikolo temas pri aktuala afero. La enhavo povas ofte ŝanĝiĝi.

Se la artikolo pli taŭgas ne por enciklopedio sed por gazeto, bonvolu publikigi la tekston en la frata projekto Vikinovaĵoj kaj krei novan novaĵon.

La atako de Hamaso kontraŭ Israelo 2023 estis terorisma ago farita sub la gvidado de la islamismaj paramilitistoj de Hamaso (aŭ Hamas, fakte la vorto ne estas esperantlingva) kaj de la Palestina Islama Ĝihado el la Gazaa Sektoro la 7-an de oktobro 2023 kontraŭ Israelo.

La atako komenciĝis per raketpafado en Israelon, sekvita de la antaŭeniĝo de teroristaj militunuoj de kaj Hamas kaj Palestina Islama Ĝihado en israelan teritorion post venkado de la barikadoj ĉirkaŭ la Gazaa Sektoro. La atakantoj povis penetri armeajn postenojn kaj eĉ milibazojn, kelkajn malgrandajn urbojn kaj ĉiuj kibucoj proksimaj al la landlimo en la okcidenta Negevo en suda Israelo, farante masakrojn de la civila loĝantaro ^[1]. Laŭ israelaj ciferoj, almenaŭ 1400 israelanoj, precipe civiluloj, inkluzive de virinoj kaj infanoj, estis murditaj, aldone de soldatoj kaj policistoj kiuj estis murditaj aŭ mortigitaj en batalo,^[2]^[3] pli ol 5 400 homoj estis vunditaj kaj ĉirkaŭ 250 aliaj kidnapitaj. Specife, 270 estis masakritaj en muzika festivalo.^[4]

Laŭdire tio estis la plej granda amasmurdo de judoj post la Holokaŭsto. Menciindas ke inter la murditoj kaj kidnapitoj estis ankaŭ ne-judoj, interaliaj arabparolantaj israelanoj kiuj estas beduenoj-islamanoj de la regiono, kaj ankaŭ agrikulturaj eksterlandaj laboristoj de Tajlando ^[5]. Ĉar la muzika festivalo estis iagrade internacia evento kaj multaj israelanoj havas duan naciecon, inter la murditoj kaj kidnapitoj estas civitanoj de pli ol 30 landoj [fonto bezonata].

Responde al la atako, la israela ĉefministro Benjamin Netanjahu deklaris militstaton unuafoje ekde la Milito de Jom Kippur en 1973. Post alvokado de plurcent miloj da rezervistoj, la Israelaj Defendaj Fortoj povis rekapti la nacian teritorion ene de kelkaj tagoj kiel parto de la kontraŭ-terora batalo "Operaco Feraj Glavoj" kaj, laŭ siaj propraj deklaroj, mortigis en la procezo pli ol 1 500 teroristojn, akompanitaj de fortaj aviadilaj atakoj kontraŭ celoj en la Gazaa Sektoro.

Proksimume tri semajnojn post la terora atako, la Israelaj Defendaj Fortoj lanĉis teran ofensivon en la Gazaa Sektoro kun la deklarata celo detrui armeajn kaj politikajn kapablojn de Hamaso kaj malhelpi estontan minacon al Israelo de la Gazaa Sektoro.

Nomigoj[redakti | redakti fonton]

Anoj kaj amaskomunikiloj de la Hamaso nomas la terorisman atakon operaco Inundo Al-Aksa (arabe عملية طوفان الأقصى, latinliterigite Amaliyyat Ṭūfān al-Aqṣā). La reaga batalo kontraŭ terorismo lanĉita de la Israelaj Defendaj Fortoj (IDF) okazas sub la nomo Operaco Feraj Glavoj (hebree מבצע חרבות ברזל, latinliterigite mivca ĥarvot barzel). En israelaj amaskomunikiloj, la esprimo milito de Simĥat Tora ankaŭ estas uzata pro la juda festo Simĥat Tora, la lasta tago de la plurtaga festo Sukoto, dum kiu la atako al Israelo komenciĝis.