Biciklista Esperantista Movado Internacia

El Vikipedio, la libera enciklopedio
(Alidirektita el BEMI)
Saltu al: navigado, serĉo
BEMI-anoj sur la ponto Zamenhof en Boulazac, Francio

La Biciklista Esperantista Movado Internacia (la oficiala mallongigo BEMI) estas la asocio de esperant-parolantaj biciklantoj.

La asocio havas membrojn en diversaj landoj de Ameriko, Azio kaj Eŭropo. Ĝi organizas internaciajn biciklajn karavanojn uzante Esperanton kiel komunan komunikilon.

BEMI fondiĝis dum la Internacia Seminario de Germana Esperanto-Junularo en la silvestra nokto 1979/1980 ekzakte je noktomezo de la svisa triopo Dietrich Michael Weidmann, Beatrix Kurt kaj Nelly Achermann kaj de kvardeko da pliaj biciklemaj kaj alternativemaj junaj IS-anoj. Ekde printempo 1980 grandkvante senprofitocele disvendiĝis rondaj plaketaj insignoj kun la slogano "Ĉu bicikli? Jes nature!", kiuj fariĝis kvazaŭ emblemo de la asocio.

la insigno "Ĉu bicikli? Jes nature!" de printempo 1980

En 1981 BEMI fariĝis la unua faka sekcio de TEJO. Ekeldoniĝis bulteno nomata "BEMI-revuo", kiu dum la sekvaj jaroj aperis laŭbezone ĝis dufoje jare. Ekde 1982 BEMI organizas internaciajn biciklajn karavanojn uzante Esperanton kiel komunan komunikilon.

La karavanon de Passau en suda Germanio tra Aŭstrio al Debrecen en orienta Hungario (770 km) dum somero 1983 partoprenis entute pli ol 100 junaj biciklistoj: Kvardeko da junaj okcidenteŭropanoj la tutan vojon, kaj miksita grupo kun aldonaj 60 orienteŭropanoj ekde la aŭstria-hungaria limo ĝis la karavana celo, la IJK 1983. Ankaŭ dum la sekvaj jaroj de la 1980-aj jaroj en iuj jaroj estas grandaj biciklaj karavanoj de BEMI, ĉefe en centra Eŭropo. Ekzemploj estas itineroj de okcidenta Germanio tra Nederlando, Belgio kaj Anglio ĝis la IJK 1984 en Swanwick (360 plus 520 km, inter tio prame de Oostende ĝis Dover), de Danio kaj Nederlando al la IJK 1985 en Eringerfeld, okcidenta Germanio (550 resp. 350 km), kaj de tie plu al la UK de Esperanto en Aŭgsburgo, suda Germanio (420 km), de Rastatt (Germanio) kaj Betschdorf (Francio) tra Alzaco kaj Svislando al La Chaux-de-Fonds en 1986 (310 km) kaj de Danio tra norda Germanio al la IJK 1989 en Kerkrade (Nederlando, 820 km). Kiam en 1990/1991 falis la politika dividiloj inter okcidenta kaj orienta Eŭropo, la organizado de tiaj komunaj bicikladoj fariĝis pli facila: antaŭe ekzemple en 1987 malsukcesis bicikla karavano al la IJK en Krakovo, Pollando, ĉar bicikla limpasado inter FRG kaj GDR, GDR kaj PollandoĈeĥoslovakio respektive Sovetunio kaj Pollando estis ne permesigebla.

Vidu ankaŭ[redakti | redakti fonton]

Eksteraj ligiloj[redakti | redakti fonton]