Malgranda Salgiro
| Malgranda Salgiro | |
|---|---|
 | |
| rivero | |
| Bazaj informoj | |
| Longeco | 22 km |
| Akvokolekta areo | 96,1 km² |
| Averaĝa trafluo | 0,27 m³/s |
| Fluo | |
| Fonto | Nordokcidentaj deklivoj de la Dolgorukova altebenaĵo |
| Enfluejo | Salgiro (ene de Simferopolo) |
| Geografio | |
| Landoj | Ukrainio |
Malgranda Salgiro (ruse Малый Салгир, ukraine Малий Салгир, krime-tatare Bala Salğır) estas rivero en Krimeo, dekstra alfluanto de Salgiro. Por alnomi la riveron oni foje uzas ankaŭ la nomon Ĉokurĉa.
Karakterizo[redakti | redakti fonton]
La rivero komenciĝas sur la nord-okcidentaj deklivoj de Dolgorukova altebenaĵo (apud la vilaĝo Druĵno) el karsta fonto, kiu situas proksimume 700 metrojn super la marnivelo. Fluante nord-okcidenten la rivero formas la Malgrandsalgiran valon fluante tra la vilaĝoj Denisovko kaj Strogonovko. Poste ĝi fluas sur la teritorio de Simferopolo, kie ĝia fluejo estas iomete arte prilaborita (ĝi estas parte pliprofundigita, fiksita per betonaj slaboj kaj plibeligita per feraj bariloj).
Ene de Simferopolo Malgranda Salgiro akceptas sian plej grandan alfluanton (dekstran) — la riveron Abdalko. Meze de Simferopolo (en la Gagarin-parko, apud la Krimea medicina universitato) la rivero alfluas la riveron Salgiro.
La akvoj de la rivero estas uzataj por irigacio, sed iuj signifaj akvorezervujoj kaj digoj sur la rivero mankas.
Historio[redakti | redakti fonton]
Oni opinias, ke en la malnova historio la rivero estis pli multakva, ĉar la dimensioj de la Malgrandsalgira valo estas tre vastaj por la nuna akvofluo. Ĝis la mezo de la 20a jarcento Malgranda Salgiro alfluis la Grandan Salgiron iom pli norde, tial inter la du riveroj (kiuj fluis iom paralele) meze de moderna Simferopolo ekzistis sufiĉe humida kaj marĉa tereno. Proksimume en la 1950aj jaroj la fluejo de Malgranda Salgiro estis artefarite ŝanĝita tiel, ke ĝi ĝis nun alfluas Salgiron pli sude (per tio oni iom sekigis la terenon kaj liberigis spacon por novkonstruataj domoj de rapide grandiĝanta Simferopolo)[1].
En la valo de Malgranda Salgiro ene de la eksa vilaĝo Lugovoje (nun apartenanta al Simferopolo) troviĝas kaverno Ĉokurĉa, en kiu oni trovis restaĵojn de la ŝtonepoka setlejo[2]. La kaverno estis deklarita kiel naturmonumento en 1964, sed nun, bedaŭrinde, troviĝas en plej neprizorgata stato[3].
Piednotoj[redakti | redakti fonton]
- ↑ Oleg Ŝirokov. Kiel oni retajlis Salgiron en Simferopolo (ruse). crimeanblog.blogspot.com. Alirita 2013-10-07.
- ↑ O. N. Bader. Setlejo de Ĉokurĉa (ruse). crimea.ru. Alirita 2013-10-07.
- ↑ La unika monumento Ĉokurĉa estas preskaŭ detruita (ruse). sevastopol.net.ua. Arkivita el la originalo je 2008-09-22. Alirita 2013-10-07.
Ligiloj[redakti | redakti fonton]
- A. N. Oliferov, Z. V. Timĉenko. Salgiro kaj ĝiaj alfluantoj (ruse). koechto-o.narod.ru. Arkivita el la originalo je 2015-07-01. Alirita 2013-10-07.
| ||||||||||||||