Baptejo Sankta Johano (Florenco)

El Vikipedio, la libera enciklopedio
Saltu al: navigado, serĉo
La baptejo Sankta Johano.

La baptejo Sankta Johano (itale Battistero di San Giovanni) estas religia konstruaĵo en Florenco (Toskanio, Italio). Ĝi havas la statuton de malgrava baziliko. En la baptejo troviĝas interalie la tombo de kontraŭpapo Johano la 23-a.

La baptejo estas unu el la plej malnovaj konstruaĵoj de la urbo, kaj estis starigita inter 1059 kaj 1128. La arkitekturo estas tipe florenca kaj romanikstila. Ĝi famiĝis pro siaj tri arte signifaj pordoj, sur kiuj videblas gravuraĵoj fare de Lorenzo Ghiberti. Tiuj pordoj estis kromnomitaj de Mikelanĝelo la "Portaloj de Paradizo" pro sia beleco, kaj estas simbole rigardeblaj kiel la eko de Renesanco.

La okangula baptejo situas ĉe la Piazza del Duomo, antaŭ la katedralo Santa Maria del Fiore kaj la sonorilturo Giotto (la Campanile di Giotto). La itala poeto Dante Alighieri, sed ankaŭ multaj aliaj artistoj kaj eminentuloj de la Renesanco (inkluzive de pluraj Mediĉoj) estis baptitaj tie. Ĝis la fino de la 19-a jarcento, fakte ĉiuj katolikaj florencanoj estis baptitaj tie. Ĝi restas ĝis hodiaŭ loko precipe ŝatata kaj respektegita de la florencanoj.