Bent Jensenius

furora primovada legolibro de Jensenius

Bent JENSENIUS (naskiĝinta en 1945 ne tro for de Kopenhago) estas dana pedagogo kaj esperantisto.

Estante filo de ĝardenfakulo li post la lerneja tempo vojaĝis al Britio, Kanado, Brazilo kaj Kolombio por vidi ĝardenojn kaj ties ecojn. Post ses jaroj da eksterlanda restado li studis patruje la lingvojn hispanan, anglan kaj germanan kaj deĵoris kiel instruisto, antaŭ ĉio en lernejoj teknikaj. Li skribis ankaŭ didaktikaĵojn por la germana kaj la angla.

En la aĝo de 55 jaroj fariĝis li esperantisto. En Esperantujo li famiĝis per la eta sed informriĉa primovada legolibro Bonvenon en nia mondo. Ĝin eldonis KAVA-PECH en la 2009-a jaro. Li ankaŭ aktivas ĉe Dana Esperanto-Asocio, eĉ estrare.

Priesperanta kalejdoskopo legolibre

En maldika libro Jensenius sukcese kaj ĉarme kovras la plejmulton de enmovadaj agadoj. Kelkaj intertempe ĉesis aŭ ŝanĝiĝis. Jen la listo de la unuopaj temoj de la unua eldono:

1. Kastelo Grezijono
2. En la ret-babilejo
3. Internaciaj Fervojistaj Ski-semajnoj
4. Ĉirkaŭ la mondo en pli ol 800 tagoj
5. Akademio de Esperanto
6. Amikoj per korespondado
7. Sur la tegmento de la mondo
8. En Vikipedio
9. Vojaĝo per boato sen krokodili
10. Monato
11. Pasporta servo
12. La Centra Oficejo de UEA en Roterdamo
13. En la klubo
14. Ne mansvingu al viaj geamikoj!
15. Verda domo de Arizono
16. La Universala Kongreso
17. Esperanto-muzeoj
18. De la Unua Libro ĝis Interreto
19. Travivaĵoj sur du radoj
20. Bona Espero
21. Esperanto en universitatoj
22. Ĝemelaj urboj
23. La Jarlibro de UEA kaj la Delegita reto
24. IJK - por la junaj en jaroj aŭ en koro
25. Je la Kabo de Bonespero
26. Ekoturismaj renkontiĝoj
27. Iom pri Esperanto-literaturo

Ĉiu parto finiĝis per pritekstaj demandoj kiuj bone uzeblas en la instruado: tiumaniere la verko fariĝis interesa lernigilo por aktiva komunikado en formo de rolludoj.