Esperantisto de la Jaro

Esperantisto de la Jaro
honoriga titolo • Wikimedia information list
Organizanto	La Ondo de Esperanto
Fondita en	1998

Hori Jasuo, Esperantisto de la Jaro 2018

Trezoro Huang Yinbao, Esperantisto de la Jaro 2017

Stefan MacGill, Esperantisto de la Jaro 2016

Chuck Smith, Esperantisto de la Jaro 2015

La Esperantisto de la Jaro estas honora titolo, aljuĝata ĉiujare de la gazeto La Ondo de Esperanto pere de internacia ĵurio. Sekretario ĝis 2017 estis Halina Gorecka (Ruslando), eldonanto de La Ondo de Esperanto, post ŝi ekde 2018 oficas Paweł Fischer-Kotowski. La proklamo de la Esperantisto de la Jaro estis iniciatita en 1998. Al la iniciato aliĝis pluraj reprezentantoj de diversaj tendencoj en la Esperanto-komunumo kaj sendependaj kompetentuloj. Ĉar la kriterioj, laŭ kiuj oni elektas la kandidatojn ne estas precize difinitaj, la verdikto de la ĵurio estas ofte submetata al kritiko. Iel ajn, oni celas premii la plej eminentajn esperantistojn.

Listo de Esperantistoj de la Jaro

Jaro	Esperantisto	Devenlando	Kialo
2024	Stela Besenyei-Merger	Hungario	Starigis Bobelarton, estis sekretario de la INK-konkursoj kaj gvidas MoVeMon, kaj literaturaj projektoj kies celo estas kuraĝigi kaj helpi novajn kaj veteranajn verkistojn
2023	Sun Mingxiao	Ĉinio	Helpis starigi Esperanto-muzeon en Ĥinujo ĉe la universitato de Zaozhuang kaj ĝenerale varbadis altlernejanojn por esperantiĝo.
2022	Edmund Grimley Evans	Britio
2021	Halina Gorecka	Rusio
2020	Fernando Maia Jr.	Brazilo	En la jaro de la kronvirusa pandemio li iniciatis kaj realigis retan okazigon de la Universala Kongreso sub la nomo “Virtuala Kongreso de Esperanto”. La reta kongreso okazis kun aliaj Esperanto-aranĝoj kadre de la pli granda MondaFest’, kio ebligis almenaŭ retan partoprenon al pluraj novaj esperantistoj.
2019	Anna Löwenstein	Anglio	En 2006 ŝi iniciatis la Movadan Foiron kadre de la 91-a UK en Florenco kaj ekde tiam prizorgas ĝin ĉiujare. Fine de 2018 ŝi iniciatis kaj ekredaktis la retejon uea.facila.org, en kiu aperas informoj kaj novaĵoj pri UEA kaj la Esperanto-movado.
2018	Hori Jasuo	Japanio	Lanĉo kaj daŭra funkciigo de la populara legoprojekto Esperanto-Sumoo, kiu en novembro 2018 atingis la 55-an sesion kun pli ol 300 legemuloj el 33 landoj, kaj regula verkado kaj eldonado de la esearo Raportoj el Japanio, kies 21-a volumo aperis ĉi-jare ĉe lia eldonejo Horizonto.
2017	Trezoro Huang Yinbao	Ĉinio	Li iniciatis kaj ekredaktis la esperantan version de la Unesko-Kuriero, kunmetis por ĝi traduko-teamon, kaj krome lanĉis la sendependan revuon Tra la Mondo.
2016	Stefan MacGill	Nov-Zelando	Lanĉo kaj realigo de la programo de UEA pri Aktivula Maturigo (AMO), speciale pro la planado kaj okazigo de pluraj AMO-seminarioj en diversaj landoj kaj pro informado pri ili kaj pri aliaj movadaj aktivadoj.
2015	Chuck Smith	Usono	La ampleksa diskonigado kaj utiligado de Esperanto en Interreto, precipe, pro la menciita pretigo kaj lanĉo de la Esperanto-kurso por anglalingvanoj ĉe Duolingo.
2014	Mireille Grosjean	Svislando	La sukcesa agado en Afriko, interalie pro la organizo de la 5a Afrika Esperanto-Kongreso; pro la aktiva laboro en ILEI, kies 47an internacian konferencon en Montevideo ŝi gvidis en julio 2014; kaj pro la preparado de la Tria Tutmonda Kolokvo pri instruado de Esperanto okazinta en 2015.
2013	Mark Fettes	Kanado	Sukcesa kungvidado de la fondaĵo ESF, kiu subtenas multajn valorajn iniciatojn (NASK, Lernu!, Edukado.net k. a.); pro la kreado kaj diskonigado de la nova Strategia Laborplano de UEA; kaj pro alporto de nova etoso kaj energio al la gvidado de UEA, en la Rejkjavika UK kaj poste.
2012	Peter Baláž	Slovakio	Starigo, evoluigo kaj prizorgo de gravaj retaj projektoj; modela kunlaboro kun landaj kaj Eŭropaj instancoj; okazigo de la Somera Esperanto-Lernejo kaj de la scienca konferenco KAEST; eldono de gravaj diskoj, libroj, broŝuroj kaj filmoj en/pri Esperanto; sukceso stimuli kaj (re)aktivigi multajn talentajn gejunulojn, kiuj sen tio eble perdus intereson pri Esperanto.
2011	Dennis Keefe	Usono	Universitat-nivela disvastigo de Esperanto en Ĉinio kaj pro la evoluigo de la projekto “Esperanto-Insulo” en Hajnano.
2010	Katalin Kováts	Hungario	Diversmaniera antaŭenigo de profesieca instruado de Esperanto, interalie, pro la popularigo kaj okazigo de la ekzamenoj laŭ la Komuna Eŭropa Referenckadro kaj pro la renovigo de la porinstruista retejo edukado.net.
2009	Aleksander Korĵenkov	Rusio	La ampleksa kaj zorga esplorado de la vivo, verkoj kaj ideoj de Zamenhof kaj pro tiutemaj verkoj kaj prelegoj, speciale pro la libro Homarano, aperinta tiu-jare okaze de la 94a Universala Kongreso de Esperanto en Bjalistoko.
2008	Ilona Koutny	Hungario	La kompetenta kaj sukcesa gvidado de la Interlingvistikaj Studoj ĉe la Universitato Adam Mickiewicz (UAM) en Poznań.
2007	Peter Zilvar	Germanio
2006	Bertilo Wennergren	Svedio	Lia gramatika libro Plena Manlibro de Esperanta Gramatiko.
2005	Povilas Jegorovas	Litovio	Lia agado en Litovio okaze de UK 2005 en Vilno.
2004	Helmar Gunter Frank	Germanio
2003	Dafydd ap Fergus	Kimrio
2002	Michel Duc Goninaz	Francio	Revizio de la vortaro Plena Ilustrita Vortaro.
2001	Osmo Buller	Finnlando
2000	Hans Bakker Maŭro La Torre Jouko Lindstedt	Nederlando  Italio  Finnlando
1999	Keppel Enderby	Aŭstralio
1998	William Auld	Skotlando	Kandidatigo por la Nobel-premio; giganta projekto Tolkien en Esperanto; prudento kaj volfirmo en la kazo "La Manto".

Rimarkoj kaj anekdotoj

• En 2000, tri kandidatoj ricevis egalan kvanton de voĉdonoj.
• En 2001, Osmo Buller kaj Claude Piron ricevis denove la saman kvanton de voĉdonoj, sed laŭ la regularo venkis Osmo Buller, ĉar pli da homoj proponis lin.
• En la belartaj konkursoj de UEA de 2017, premiiĝis la eseo La esperantisto de la jaro (1887-1997). En tiu verko Javier Alcalde sugestas homojn, kiuj meritis gajni la honoran titolon en la jaroj antaŭ 1998.

Vidu ankaŭ

• Kandidatoj ĝis 2010
• Laŭreatoj

Eksteraj ligiloj

• Intervjuoj kun la laŭreatoj