Afromontano

Afromontanaj zonoj. I. Okcidentafrikaj kaj kamerunaj altaĵoj, II. Etiopaj kaj arabaj Altaĵoj, III. Okcidenta Rifto, IV. Orienta Rifto. V. Suda Rifto, VI. Orientaj Altaĵoj, VII. Drakensbergoj.

Afromontano estas biogeografia faktermino por indiki etaĝon en la montaroj de Afriko kaj de suda Arabujo kun ĝiaj planto- kaj bestospecioj. La afromontanaj regionoj estas malkontinuaj, apartigitaj unu de la alia per malaltebenaĵoj, kaj estas foje referitaj kiel "afromontana insularo", ĉar ilia disvastiĝo estas analoga al serio de ĉielinsuloj.

Geografio

La afromontanaj komunumoj troviĝas super altitudo de 1500-2000 metroj proksime de la ekvatoro, kaj tiel malalte kiel 300 metrojn en la montarbaroj de Nejsna-Amatole, Sud-Afriko. Afromontanaj arbaroj estas ĝenerale pli malvarmetaj kaj pli humidaj ol la ĉirkaŭaj malaltebenaĵoj.

La "afromontana insularo" plejparte ampleksas Grandan Rifton ekde Ruĝa Maro ĝis Zimbabvo, kun la plej grandaj areoj en Etiopaj Altaĵoj, Okcidenta Rifto de Ugando, Ruando, Burundo, Demokratia Respubliko Kongo, Tanzanio, kaj Orient-arka Altebenaĵo de Kenjo kaj Tanzanio. Aliaj afromontanaj regionoj inkludas Drakensbergojn de Suda Afriko, Kamerunajn Altaĵojn, kaj Kamerunan Vulkanan Linion inkluzive de Monto Kameruno, Bioko, kaj Sao-Tomeo.

Flaŭro

Kvankam kelkaj afromontanaj enklavoj estas tre malproksimaj unu de aliaj, ili samhavas similan miksaĵon de plantospecioj kiuj ofte estas diferencaj de tiuj de la ĉirkaŭaj malaltebenaĵoregionoj. Podokarpacoj, el la genroj Podocarpus kaj Afrocarpus, estas karakterizaj arboj, kune kun Prunus africana, Hagenia abyssinica, altkreska junipero, kaj Olea sp.. En la pli altaj montoj, la etaĝo de afromontana arbaro aŭ maldensarbaro transiras al pli alta afroalpina (altmontara) etaĝo de herbejoj, arbustaroj, aŭ torfejoj.

La plantofamilioj Curtisiaceae kaj Oliniaceae estas afromontane endemiaj kaj la familio Barbeyaceae estas preskaŭ-endemia. La arbogenroj Afrocrania, Balthasaria, Curtisia, Ficalhoa, Hagenia, Kiggelaria, Leucosidea, Platypterocarpus, Trichocladus, Widdringtonia, kaj Xymalos estas afromontane endemiaj aŭ preskaŭ-endemiaj, kiel tia la plantogenroj Ardisiandra, Cincinnobotrys, kaj Stapfiella.

Disvastiĝo

En Sud-Afriko, la afromontanaj arbaroj kovras nur 0,5 % el la kampara regiono de la lando. La afromontanaj arbaroj troviĝas laŭlonge de la montara arko de Drakensbergoj, ekde Provinco Limpopo en la nordoriento al Okcidenta Kablando en la sudokcidento.

La afromontanaj arbaroj ĝenerale situas en bone akvumitaj areoj, inkluzive de ravinoj kaj suden fruntantaj deklivoj. La afromontanaj arbaroj estas netoleremaj al fajro, kaj la oftaj incendioj de la ĉirkaŭaj finboso, savano, kaj herbejo limigas la vastiĝon de la arbaroj. Malgraŭ sia malvasta areo, la afromontanaj arbaroj de Sud-Afriko produktas valoran konstrulignon, precipe de Podocarpus latifolius, Afrocarpus falcatus, kaj Ocotea bullata.

Afromontanaj ekoregionoj

Rilataj artikoloj troviĝas en Portalo pri Biologio

Rilataj artikoloj troviĝas en Portalo pri Afriko

Tropikaj kaj subtropikaj humidaj foliarbaroj

• Etiopiaj montarbaroj (Eritreo, Etiopujo, Somalujo, Sudano)
• Gvineaj montarbaroj (Gvineo, Eburbordo, Liberio, Siera-Leono)
• Kamerunaj montarbaroj (Kameruno, Niĝerio)
• Monto-kamerunaj kaj biokaj montarbaroj (Kameruno, Ekvatora Gvineo)
• Montarbaroj de Nejsna-Amatole (Sud-Afriko).
• Okcident-riftaj montararbaroj (Demokratia Respubliko Kongo, Burundo, Ruando, Tanzanio, Ugando)
• Orientafrikaj montarbaroj (Kenjo, Suda Sudano, Tanzanio, Ugando)
• Orientark-altebenaĵaj arbaroj (Tanzanio, Kenjo)

Montaraj herbejoj kaj arbustaroj

• Alt-veldaj herbejoj (Lesoto, Sud-Afriko)
• Angola montara arbaro-herbejo mozaiko (Angolo)
• Angol-eskarpaj savano kaj maldensarbaroj (Angolo)
• Drakensbergaj altmontaraj herbejoj kaj maldensarbaroj (Lesoto, Sud-Afriko)
• Drakensbergaj montaraj herbejoj, maldensarbaroj kaj arbaroj (Lesoto, Sud-Afriko, Svazilando)
• Etiopaj montaraj herbejoj kaj maldensarbaroj (Eritreo, Etiopujo)
• Etiopaj montaroj torfejoj (Etiopujo)
• Jos-altebenaĵa arbara-herbeja mozaiko (Niĝerio)
• Maputalandaj-pondolandaj arbustaroj kaj veprejoj (Mozambiko, Sud-Afriko, Svazilando)
• Montaraj torfejoj de Ruvenzori-Virunga (Demokratia Respubliko Kongo, Ruando, Ugando)
• Orient-afrikaj montaraj torfejoj (Kenjo, Suda Sudano, Tanzanio, Ugando)
• Orient-zimbabva montara arbaro-herbejo mozaiko (Mozambiko, Zimbabvo)
• Sud-malavia montara arbara-herbeja mozaiko (Malavio, Mozambiko)
• Sud-rifta montara arbara-herbeja mozaiko (Malavio, Tanzanio)

Dezertoj kaj kserofitaroj

• Sudokcident-arabaj montaraj maldensarbaroj (Sauda Arabujo, Jemeno)

Bibliografio

Rilataj artikoloj troviĝas en Portalo pri Geografio

• angle White, F. 1983 : The vegetation of Africa: a descriptive memoir to accompany the UNESCO/AETFAT/UNSO vegetation map of Africa by F. White. UNESCO, Parizo.
• angle Galley, C. & Linder, H. P. 2006 : Geographical affinities of the Cape flora, South Africa. Journal of Biogeography 33 (2), 236-250.

Eksteraj ligiloj

• angle Orienta afromontana (Naturprotekto Internacie)