Duvalenta operacio

Duvalenta operacio aŭ duargumenta operacio estas operacio kies valento estas du, do funkcio ĵetanta kartezian produton A×B de du aroj al iu aro C. Tre ofte A, B kaj C estas la sama aro, do funkcio ĵetanta A×A al A — tian ĉi apartan specon de operacio oni nomas interna operacio, ekzemple la bazaj operacioj adicio, subtraho, multipliko kaj divido.

Notacio

Por la duvalentaj operacioj plej ofte oni uzas intermetan operaciskribon, ĉe kiu la operacisimbolo situas inter la operandoj.

Pluraj duvalentaj operacioj povas kombiniĝi, ekzemple:

$(a+b)\times (c-d)$

En komputado aŭ en matematiko por eviti la neceson uzi krampojn, oni povas uzi senkrampajn operaciskribojn:

• antaŭmeta operaciskribo (la operacisigno antaŭ la operandoj): $\times +a\ b-c\ d$
• postmeta operaciskribo (la operacisigno post la operandoj): $a\ b+c\ d-\times$

Ankaŭ ekzistas la funkcia operaciskribo kun literaj funkcinomoj anstataŭ simboloj, kaj krampoj, ekz-e: $f(g(a,b),h(c,d))$ aŭ mult(plus(a,b),minus(c,d)).

Ecoj

Duvalentajn operaciojn oni ofte karakterizas per iliaj proprecoj, ekz-e komuteco, asocieco, distribueco.