La unua rapoto pri vilaĝo Libkov, iam en pasinteco nomata ankaŭ Lipkov, estas el la jaro 1329, kiam monaĥejo Vilémov transigis dezertan distrikton de Bojanov por koloniigo al Jindřich de Lichtenburk. Poste la vilaĝo apartenis al sinjorejo de Oheb, pli poste nomata de Seč. Post la batalo sur Blanka monto estis tiu ĉi sinjorejo subigita al sinjorejo Nasavrky. Dum la 16-a jarcento posedis ĝin la nobela familio Schönfeld kaj inter la jaroj 1746 kaj 1945 posedis la urbon Nasavrky kaj bienegon familio Auersperg.
Domposedantoj kaj bienistoj el Libkov devis servute labori. Vintre ili laboris en sinjoraj arbaroj. Ili faligadis arbojn, veturigadis lignon al la rivero Chrudimka kaj printempe flosigadis ĝin malsupren.
En Libkov oni multe kulturis linon, kiun oni hejmece ŝpinis kaj teksis. Kiam ŝpinado kaj teksado poste efektiviĝadis plejparte en fabrikoj, trovis virinoj el Libkov novan enspezfonton en retado de harretoj. Viroj estis ĉefe okupataj kiel veturigistoj. Plej multe ili veturigadis lignon en fervojan stacion en Slatiňany.